咁就坐月坐左一大半，坐月真係幾鬼悶。
人夫最叻嘅就係說服左我，叫個親戚過嚟做全日嘅陪月，所以而家坐月坐得好舒服。我換過兩次片咁大把。大細孖養到肥肥白白，由四磅幾養到開始有雙下巴。當然個親戚走嘅時候我就瀨嘢哈哈哈，所以辛苦係只不過遲啲先開始姐。
我生之前嗰幾個禮拜簡直係黑過墨汁。一月嘅時候已經請工人，俾足三個月時間，懶醒咁諗住四月佢離一定冇死。點知佢嚟到香港個體檢唔合格。唔好問點解菲律賓個體檢合格跟住出到Visa。喺菲律賓嗰邊用假報告，定係香港呢邊同佢地一齊食夾棍我唔知。用大牌子成日賣廣告嘅agent都係唔可靠。浪費晒我啲時間要同佢哋周旋。啲Agent收到錢就變臉，幾大牌咁同我講：「我聽日放假，你唔會搵到我㗎啦，你自己鍾意就去客戶服務嗰邊投訴啦。」記得係電話一路爆佢粗，一路行入去診所做產檢，血壓即刻爆升。我呢位高齡High Risk Twins產婦，一路已經手腫腳腫，我OG同學以為我中PET妊娠毒血症。即刻幫我抽左幾筒血🤣。
當然我又要忙着搵另外一間Agent去再請工人。34週大住肚上去Agent度同工人面試時，我指住個肚同agent+工人講，你地唔好玩9我，我已經行路好辛苦。你要呃我錢博炒你早啲講，唔好等我等左三個月又係冇工人我死畀你睇。我話之前嗰間我就嚟報勞工處入境處同埋搵蘋果兼夾上埋菲律賓領事館，你唔好要我順便報埋你呢一間。當然佢話唔呃我都係五五波，六月尾希望工人黎個陣係正常。😞😞
同一時間，我之前請嘅陪月甩我底。已經講明係有孖B同隻狗，佢話OK架個陣！生之前兩個禮拜，佢同我講淥親隻腳嚟唔到，怕有傷口唔方便照顧BB。 佢睇過醫生，醫生叫佢過幾日複診，咁即係唔係嚴重到要入Burns Unit要植皮啦？！淥親最多咪有水撲，加/減傷口，我自己親自幫你洗傷口都得啦？ ！淥親駛乜唔返工呢？兩個禮拜後都好得7788！之前未諗清楚就唔好接我呢份工！😡😡😡😡😡😡
呢啲咁流嘅藉口，如果唔係我搞緊工人啲嘢，我真係日日打去D7佢⋯⋯sorry唔係，係問候佢⋯⋯嘅傷口狀況。作為一個專業又關心人嘅醫生，我冇理由唔分享啲傷口護理知識比佢㗎。佢好彩，揀咗我最忙嘅時候等我唔得閒理你，你好嘢！
所以偉大嘅人夫喺短短兩個禮拜幫我班到個親戚過嚟，我覺得好利害。塞翁失馬，焉知非福！ 呀親戚超級犀利，因為佢之前都有做陪月嘅經驗，佢非常能幹同獨立，乜都自己做晒。佢仲得閒可以整吓嘢食。不過我都嗱嗱臨訂咗月子餐等佢少啲負擔，淨係專心湊BB。又咁好彩俾我搵到一間社企仲有位比我訂餐。而家夜晚我訓到死左，一次BB喊聲都聽唔到🤣🤣🤣！
***
聽聞黑芝麻可以上奶，日頭咁得閒就諗住自己整芝麻糊。唉，簡直攞苦嚟辛！黑芝麻我又炒得唔夠熟，一陣草青味。開架機磨佢又唔記得隔渣，總之搞到馬鬼煩。最尾我都覺得係唔太難食，但係實在太多功夫啦！都係買返即食芝麻糊哈哈！
Search